തൊണ്ണൂറുകളുടെ ഒരു മധ്യവേനൽ പകൽ…ആകാശം തുളച്ചൊരു വെടിയൊച്ച…ചിലർ കേട്ടു..ചിലർക്ക് കേട്ടത് പോലെ തോന്നി..ചിലർ കേട്ടതേ ഇല്ല…

രണ്ടു മലകൾക്ക് ഇടയിലെ ചെരുവിലായിരുന്നു വീട് ഇരുന്നത്..അത് കൊണ്ട് തന്നെ വീട്ടുകാർക്കും അയൽവാസികൾക്കും ഏതു മലമുകളിൽ നിന്നാണ് വെടിയൊച്ച മുഴങ്ങിയത് എന്ന് തിട്ടമില്ലായിരുന്നു…

പുലിചാടിയകുളത്തിൽ കുഞ്ഞേട്ടൻ, കിഴക്കേ മലയുടെ മുകളിലെ തന്റെ പുരയിടത്തിൽ പശുവിനെ തീറ്റിക്കുക ആയിരുന്നു..കള്ളി മുണ്ട് മടക്കി കുത്തി, തലയിലെ വിയർപ്പ് മണം നിറഞ്ഞ ചുമന്ന തോർത്ത് മുറുക്കി കെട്ടി, താഴെ റബർ പ്ലാറ്റ്ഫോമിൽ പുല്ല് അരിയുകയായിരുന്ന സ്വപത്നി കുഞ്ഞെലിയെ കൂവി വിളിച്ച് ചോദിച്ചു..

“എടി കൂവേ, നീ കേട്ടായിരുന്നൊടി ഒരു വെടി പൊട്ടുന്ന ഒച്ച..”

കേൾവിക്ക് അല്പ്പം പിന്നോക്കാവസ്ഥയിൽ ആയ കുഞ്ഞേലി മുരടനക്കുക മാത്രം ചെയ്തു..ചെന വരാത്ത പശുവിനെ കുറിച്ച് ഓർത്ത് മനസ്സിൽ വേവലാതി കൂട്ടി…

കൂഴച്ചക്ക കുരുവടർന്ന് വീണു ചീഞ്ഞളിഞ്ഞ മണം മുറ്റി നില്ക്കുന്ന റബർ പ്ലാറ്റ്ഫോമുകൾക്കിടയിലൂടെയുള്ള കുത്തൻ ഇറക്കങ്ങളിലൂടെ ഓടി, പശുവിനെയും തെളിച്ച് കുഞ്ഞേട്ടൻ താഴെ മാസ്റ്റരുടെ വീട്ടിലേക്ക് ഓടി കയറി..

“മാഷെ, ടീച്ചറെ…കേട്ടാരുന്നൊ ഒരു വെടിയൊച്ച”

ചുണ്ട് മൂടിക്കിടന്ന മീശ കത്രിക കൊണ്ട് വെട്ടിയൊതുക്കി കൊണ്ടിരുന്ന മാസ്റർ കത്രിക താഴെയിട്ട് അടുക്കള ഭാഗത്ത് നിന്ന് എത്തി നോക്കി ചോദിച്ചു

“എന്നതാ..കുഞ്ഞേട്ടാ..”

“വെടിയൊച്ച കേട്ടാരുന്നോന്നു..”

“വെടിയൊച്ചയൊ…??” മാസ്റർ അത്ഭുതപ്പെട്ടു..

അടുക്കളയിൽ നിന്നും പാത്രം കീഴെയിട്ട് ടീച്ചർ ഒച്ച വെച്ചു…

“ഞാൻ കേട്ടു…എന്തോ പൊട്ടുന്ന പോലൊരു ശബ്ദം…”

“അവക്കല്ലെങ്കിലും കേൾവി കുറച്ചു കൂടുതലാ…അത് കൊണ്ട് കമ്പ്ലീറ്റ് ആയി വിശ്വസിക്കണ്ട “

മാസ്റർ ശബ്ദം കനപ്പിച്ച് പറഞ്ഞു…

അനാവിശ്യമായ ഒരു വഴക്കിനു വഴി മരുന്നിടാൻ താത്പര്യം ഇല്ലാത്തത് കൊണ്ട്…തന്റെ കൊന്പൻ മീശ വിറപ്പിച്ച് കുഞ്ഞേട്ടൻ നില്കാതെ ഓടി…

കാട മാത്യുവിന്റെ പുരയിടം ഒഴിഞ്ഞു കിടന്നത് കൊണ്ട് ആരും കേള്ക്കാൻ സാധ്യത ഇല്ല…മുരിക്കൻ ഹാജ്യാരുടെ തെങ്ങിൻ തോട്ടവും, ആട്ടിൻ കാഷ്ടം മണക്കുന്ന തൊഴുത്തും ഓടി കടന്നു..അയാള് സുജനപാലിന്റെ വീട്ടു മുറ്റത്തെക്ക് ഓടി കയറി…

സുജനപാൽ എന്തോ വെപ്രാളത്തിൽ ആയിരുന്നു…കുറച്ച് മാസം മുന്പ് ഒറ്റപാലത്ത് നിന്നും വന്നു വീടും സ്ഥലവും വാങ്ങി താമസിക്കുന്ന സുജനപാലിനെ കുഞ്ഞേട്ടനും വലിയ അടുപ്പം ഇല്ലാരുന്നു…പൊതുവെ കർഷകർ മാത്രം (മാസ്റ്റരും പറഞ്ഞു വരുന്പോൾ ഒരു കർഷകൻ ആണ് ) താമസിക്കുന്ന ആ മല നാട്ടിലെ കർഷകൻ അല്ലാത്ത, പ്രത്യേകിച്ചൊരു തൊഴിൽ ഇല്ലാത്ത ഒരാളായി സുജനപാലെ ഉണ്ടായിരുന്നുള്ളൂ..!!

സുജനപാലിന്റെ നില്പ്പും ഭാവവും എന്തോ കുഞ്ഞേട്ടന് അത്രക്കങ്ങു ദഹിച്ചില്ല…സുജനപാൽ ചിരിച്ചില്ല..വെപ്രാളം ദീര്ഘിപ്പിച്ചൊരു നോട്ടമെറിഞ്ഞു ആഗമനൊദ്യേശ്ശം ആരാഞ്ഞു..

“ഓ..ഒരു വെടി ..”- കുഞ്ഞേട്ടൻ മുഴുമിപ്പിച്ചില്ല..

“വെടിയൊ..അതിനു ഇവിടെവിടാ പൂരം..” സുജനപാൽ ഗൌരവം വിടാതെ ചോദിച്ചു..

തലയിൽ കെട്ടിയ തോർത്ത് അഴിച്ച് മുഖം തുടച്ച്, അതൊന്നു കുടഞ്ഞു വീണ്ടും തലയിൽ കെട്ടി കുഞ്ഞേട്ടൻ പടിയിറങ്ങി..സ്വയം പിറു പിറുത്തു..

“അല്ലേലും അവനിച്ചിരി ദുരൂഹത കൂടുതലാ..”

സംഭവം മാസ്റ്റരുടെ  അഞ്ചേക്കർ പുരയിടത്തിലെ കുന്നിൻ മുകളിൽ, റബർ തോട്ടത്തിനു മുകളിൽ, പതിനഞ്ച് സെന്ററിൽ ചരിഞ്ഞു സ്ഥിതി ചെയ്യുന്ന കശുമാവിൻ തോട്ടത്തിൽ നിന്നായിരുന്നു വെടി ശബ്ദം കേട്ടത് എന്നത് സത്യം ആണ്..

പ്രത്യേകിച്ച് ഒരു ജോലിയും ഇല്ലാതിരുന്ന..വരുമാനത്തിനു ഇടവ് ഇല്ലാത്ത സുജന പാലിനെയും കുടുംബത്തെയും ആയിരുന്നു കുഞ്ഞെട്ടനു സംശയം..മാസ്ടർക്ക് വെടിയൊച്ച ഒന്നും കേൾക്കാത്തത് കൊണ്ട് അങ്ങിനെ ഒരു സംഭവം ഉണ്ടായതായി ഉറപ്പിച്ച് പറയാനും കഴിയുന്നുണ്ടായിരുന്നില്ല…

വിഗ്രഹ മോഷ്ടാക്കളെ പിടി കൂടാൻ വന്ന പോലീസ്കാരാണ് വെടി വെച്ചത് എന്ന് ഒരു കഥ പുറത്തിറങ്ങി..മാസ്റ്റരുടെ കശുമാവിൻ തോട്ടത്തിൽ വെച്ച് സുജനപാലിന്റെ വീട്ടിൽ രഹസ്യമായി ഒളിപ്പിച്ച് വെച്ച വിഗ്രഹം കൈമാറുന്പോൾ പോലീസ് പിടികൂടുകയായിരുന്നു എന്ന് വാർത്ത പ്രചരിച്ചു..അങ്ങിനെ ആണെങ്കിൽ തന്റെ സ്റെഷനിൽ എങ്കിലും മിനിമം കേസ് റിപ്പൊർട്ട് ചെയ്യപ്പെടും എന്ന് റൈറ്റർ കേശവൻ കഷണ്ടി തടവി ബോധിപ്പിച്ചു..

അതല്ല..സുജനപാലിനു ചില നക്സലറ്റ് ഗ്രൂപ്പുകളുമായി ബന്ധം ഉണ്ടെന്നും..ആന്ധ്രാ പോലീസ് സ്പെഷ്യൽ സ്ക്വാഡമായുള്ള ഏറ്റു മുട്ടലിൽ സുജനപാലിന്റെ വീട്ടില് രഹസ്യമായി ഒളിച്ച് താമസിക്കുകയായിരുന്ന പ്രവർത്തകരെ കാട്ടിൽ ഒളിപ്പിക്കുന്നതിനിടെ പോലീസ് കണ്ടു പിടിച്ച് അറസ്റ്റ് ചെയ്ത് കൊണ്ട് പോവുകയായിരുന്നു എന്നൊരു തിയറി ഉരുത്തിരിഞ്ഞു..

സുജനപാലിന്റെ പതിനെട്ട് വയസ്സുകാരി മകളുടെ കാമുകനെ കശുമാവിൻ തോട്ടത്തിൽ വെച്ച് യാദൃശ്ചികമായി കണ്ട സുജനപാൽ തന്റെ നാടൻ തോക്ക് വെച്ച് ഷൂട്ട് ചെയ്തതാണെന്നും ചില കഥകൾ പുറത്തിറങ്ങി..

************************************************

(തുടരും..)
അദ്ധ്യായം 2